Jer 20 | KYC | STEP | Dokopa purisi akali Pasa lenge akali Imana ikinyingi doko tembole anda dokona mupwa ingyuo kareyamo dokome namba pii renge dokona lao kareyono doko siya.

Jeremiah 20

Jeremayapa Pasapa Sisu Nyuo Lao Kareyambi

1 Dokopa purisi akali Pasa lenge akali Imana ikinyingi doko tembole anda dokona mupwa ingyuo kareyamo dokome namba pii renge dokona lao kareyono doko siya. 2 Sepala baame tembole anda Benjamene Kame Kambu Ketae lenge dokona repeta namba pyapala ane angapumi kiimbuo nyinya leya. 3 Dokona yangama dokopa Pasame namba neta nyiyamo dokopa nambame baa lamaiyuo, Kamongo dokome embena kingi Pasa kaepala Wambu Paka Renge Maiyuo Paenge Akaliŋi lape lapya, leya. 4 Kamongo baa rangeme lao, Nambame emba range paka renge joo dee embena puu minyingi dupwa maiyuo pirunupa nakama peparae nakamana nyisu petenge dupwame wua gelame pyao kumakaraminyipa emba kandare, leya. Nambame Juta wambu dupwa peparae nyuo Bapilonena kiŋi akali doko keta mairunupa baa lapo karapusi ingyuo puu maiyuo nyuo banya yuu dokona lanyuo pao dee lapo pyao kumako pira, leya. 5 Nambame nakamana yanda pimwai dupwame yuu taone andake dakena panda maiyuo kaeyaronopa epo nakambana mena bangepe kamonganyi nembengepe rungi rungi pingipi dupwa peparae andambupi nao nyuo pao dokopa Juta kiŋi dupwana kana bangepe dupwa opetae nyuo yuu Bapilone dokona nyuo pao kaki pirami. 6 Pasa emba doko embena ree palu dupwape peparae minyarapala nyepala yuu Bapilone dokona lanyuo parami. Dokona emba kumarenepa embena puu minyingi lapo kyambo malu lamaiyuo kareene dupwa pipya malu pirami.

Jeremaya Kamongo Kando Mumu Leya

7 Kamongo embame namba minyoko piinyipa
namba minyoko pisi karalyono silyu.
Emba keta porai palenge dokome
nambapa manda manja nalyamo.
Dokona lao wambu dupwame namba kando giyalya giyana pyuo nyuo
male male lao karaminyi.

8 Namba yuu peparaena pii lapunu yaka lao ee lao pii poraiyuo lao pilyu doko
Randa Andake Epo Yuu Doko Kwaeyo Para ingilyamo lao lao karapunu pilyamo.
Kamongo namba embena pii dokona lao lakao papipunu dokona
namba kando yuu peparae giyalya giyana pyuo isa nembele lao letaminyi.
9 Dopa pipyamo dokona nambame Kamongo kame soo kaepala
banya kingi dokona laa naro lao karapunupape
Kamongo embena pii pyasi doko nambana mona dokona isare ingyuo
koko rao ango silyamo.
Sipyasa pii doko neta nyuo laa nalana suu pyapunupape
kapa kame pyuo minyaro ingya nao nambana kambu dokona neta epelyamo.
10 Namba sipunu dokopa wambu peparaeme isa isa paeyo lao,
Yuu peparaena paka renge dokonako maipilyamoŋo, letaminyi.
Gapomane akali dupwa banya lao lamaimanale.
Dopako pyuo nambana puu minyingi angi dupwame namba koo keta palepe lao kandaro karaminyi.
Nakamame lao, Mendeme baa alyikilyi pyuo nyuo iso kota nembara dokopa
namwame baa minyarapala moŋo mairama, letaminyi.
11 Dopa laminyipape Kamongo emba ama kamame porai wakasa doko nambapa karene dokona
lapome namba randa jilyaminyi dupwa isa parami.
Nakama pyuo ayemba palyarami ingya nalyamo dokona elya nyuo karalu kararami.
Nakama wini pirama kata mende see nayasa elya nyiyama lao kararami.
12 Dopa piraminyipape Kamongo Porai Wakasa embame wambu peparae rolae dokona makande pyuo kandenge.
Nakamana mona kyawa sisingipi dupwana aki palamo doko embame soo oto karapinyi pilyamo.
Dokona nambana randa dupwa embena kingi raka dokona palyilyu.
Dokona nambame nyisu petenge dupwa pipya moŋo maiya kare doko kandarowale.
13 Akali yulu koo pingi dupwame randa maiminyi karaminyi wambu dupwa
kiiramo nyingi dokona suu pyao
Kamongo doko kenane pyao
banya kingi ketae pyambuo lakandamanale.

14 Namba mandeyaminyi yuu gii doko kopyaliŋi lamana.
Anyimi namba mandeyamo yuu gii doko mupwa lao suu pyaa namanale. Kopyali ingyuo peelyamo lao suu pyamana.
15 Akali mendeme namba mandeyaminyi dokopa
wane mende manjakalaminyi lao epo rakane lamaiyuo
rae mainyi pyambuyamo akali dokona kingi kopyali ingyuo penale.
16 Kamongome yuu taone lapo sakame kuma nao
pyao kokwa siya dopale ingyuo baa penale.
Baa yangama dokopa rando ee larami dokope
korakama dokopa yanda pyala panya kee kupi larami dolapo soo karena.
17 Renge dokona lao namba ingi anda peteyono dokopa akali dokome namba pyao kumaka naya.
Manjipa nayamopa namba piyali dokopa nambana anyinya ingi anda doko nambana malu anda ingiyali.
18 Namba akipamo mandeyamisi?
Randa nyuo mona rando
elya paleta karo kumare lao mandeyamisi? ^{▼▼21:1—22:30Juta wambupi kiŋi dupwapeme Anatu kamba lao kareyaminyi dokona nakama keta randa epo yuu doko kokwa sera ingilyamo, Kamongome lapusa pilyamo, Jeremayame leya.}